«رزنامة الأشواق»

ياللي سريت العام تصبح على خير
للصبـح نجـمِ فــي طوالع جبيـنـك
تعبت ادور عنك في زحمة السيـر
ياللي المسافه جرح بينـي وبينـك
عجزت الأقـي للغيابـات تبريـر
رزنامة الاشـواق تنعـي سنينـك
شخبار قلبـك والمواثيـق والبيـر
والدبله اللي حشرجة فـي يمينـك
من فيهم اللي بـاع مبـداه للغيـر
من فيهم اللـي بقسوتـك مايدينـك
شيصير يعني لو تعذرت شيصيـر
يا زارع التحنان عطنـي سمينـك
تعال بس شوي وارحل مع الطيـر
على الاقل تفـرك يدينـي يدينـك
وان شفت باللي اطلبه منك تبذيـر
ما قلت لك شلني علـى راحتينـك
وان جاك مني ياهوى البال تقصير
اسمع صدى حزني اذا صحت وينك
صب السوالف لا تموت المباهيـر
واقدع من عذوق الغـلا تمرتينـك
خليتنـي ابـلا سبـب للمقـاديـر
تطرب على نغمة مواجع سجينـك
لو روميو يعرف مارب شكسبيـر
ماتشرب كمومي مدامـع حنينـك
تسكن بصدري بس ماتلبث تطيـر
وانا عيوني تنتظـر ليـل عينـك
وشلون بصبح في غيابك
على خير الخير وينه وانـت والنـوم وينـك