وجدان..

كان عشقه كبير.. وكان توه صغير..
أقصد إنه شباب وخافقه في صباه
حبّته بنت حلوه طيبها يستثير
حِبّها كان حلم .. ووصلها منتهاه!
صدرها من سحاب وشعرها من حرير
بينهم حط ربّي سرّ من جاه .. تاه!
كانو ليا تلاقو : مسك ينطح عبير!
لأروته من شهدها إرتوت من دفاه
أذكره يوم غابت عنّه وقلت:خير؟
قال: ياخوي أحس إن في غلط بالحياه!
غافل الدمع عينه.. وافتكرها بخير
وأطلق الوجد زفره طالعه من حشاه
من كثرما فقدها كان عقب الأخير
مايسولف بشي إلاّ ويلحقه (آه)!
أذكر إني سألته يوم جا يستشير
في البنيّه وش اللي علقه؟وش بلاه؟
قال لي:ماتصدّق كل لقا وش يصير..
من حياها تعيي ماتشيل العباه!
وإن جلسنا نسولف عينها في الحصير
تستحي من عيوني عين هاك المهاه!
قبلها كنت غير .. وبعدها صرت غير
كم وطى القلب شيٍ قبلها ماوطاه!
حب وجدان قدّاني وطال المسير
وين ما أسوق رجلي ماأمشي إلا وراه!
حب وجدان ماهو بين روح وضمير
حبّها فوق أحاسيس البنادم مداه
من سما القلب تطرح غيرها طير
طير مير مافيه طيرٍ غيرها في سماه!
في مدينة ظلوعي حبّها صار أمير
سادني حكم رمشه .. وإستلمني هواه
وكثر ما أقول عن وجدان حكيٍ كثير..
أشعر إني رفعت الحكي عن مستواه!
دونها كل شيٍ في حياتي صغير
إلاّ أنا ! .. أكبر (أبغى الحب ياخذ مداه)!